Колумбиската Армија за национално ослободување ќе ги прекине нападите до референдумот

Втората по големина бунтовничка групација во Колумбија, Армијата за национално ослободување (ЕЛН), прогласи едностран прекин на нападите до 2 октомври, за кога е закажан референдумот за мировната спогодба меѓу Владата и Револуционерските вооружени сили на Колумбија (ФАРК), изјави колумбискиот министер за внатрешни работи Хуан Фернандо Кристо. 

- Одлуката, која ја соопшти ЕЛН е добар знак и Владата ја поздравува. Таа ќе го овозможи гласањето на териториите, каде дејствува ЕЛН, рече Кристо на прес-конференција.

Тој изрази надеж дека ЕЛН ќе ги ослободи сите заложници, кои ги држи и ќе се откаже од праксата да киднапира луѓе.

- Доколку тоа биде решено во следните недели, ќе можеме да седнеме на преговарачка маса со веќе објавениот дневен ред. Владата е целосно подготвена за дијалог, но тие бунтовници треба да сфатат дека во ова време киднапирањата се неприфатливи за колумбиското општество, додаде Кристо.

Колумбијците ќе гласаат на 2 октомври за тоа дали да се одобри со закон мировната спогодба меѓу Владата и ФАРК, најголемата бунтовничка група во земјата.