Кина ги укина специјалните пристанишни такси за американските бродови

Кина ги укина специјалните пристанишни такси за американските бродови за една година, како одговор на сличен потег од Вашингтон, соопшти денеска Министерството за транспорт на Кина.

Според соопштението на Министерството за транспорт на Кина, наплатата на специјалните пристанишни такси „ќе биде суспендирана за една година“ од 10 ноември, што се совпаѓа со суспензијата на релевантните мерки против Кина од страна на САД, како дел од спроведувањето на консензусот постигнат на економските и трговските консултации меѓу Кина и САД во 2025 година во Куала Лумпур, се вели во соопштението.

На 17 април, американските власти воведоа специјални пристанишни такси за бродовите што се упатуваат кон Кина, а како одговор, Кина почна да наплаќа специјални пристанишни такси за американските бродови на 14 октомври.

Овој данок се однесуваше на бродови во сопственост или управувани од американски компании, како и на бродови што пловат под американско знаме или се изградени во Соединетите Држави.

Денеска стапија на сила и серија кинески одлуки, со кои се елиминираа дополнителните тарифи за американска стока и контролите на извозот за одредени американски компании.

Овие одлуки следеа по неколку рунди кинеско-американски трговски и економски консултации во Куала Лумпур, како и по состанокот меѓу кинескиот претседател Си Џинпинг и американскиот претседател Доналд Трамп, што се одржа на 30 октомври во Бусан, Јужна Кореја. 

МИА