Јапонскиот премиер го откажа учеството на самитот на НАТО

Јапонскиот премиер Шигеру Ишиба нема да присуствува на самитот на НАТО во Хаг, кој започнува утре, објави ДПА, повикувајќи се на јапонското Министерство за надворешни работи.

Според соопштението, причината се различни околности, но не се дадени конкретни детали.

Јапонската телевизија Фуџи објави дека Ишиба ја донел одлуката поради веројатното откажување на планираниот состанок меѓу НАТО и земјите од Индо-пацифичката четворка – Јапонија, Јужна Кореја, Австралија и Нов Зеланд, како и малата шанса за одржување билатерална средба со американскиот претседател Доналд Трамп.

Јужна Кореја и Австралија, исто така, објавија дека нивните лидери нема да присуствуваат на форумот. Според извор, Трамп изразил желба да одржи состанок на високо ниво со лидерите на Индо-пацифичката четворка.

И покрај отсуството на премиерот Ишиба, јапонскиот министер за надворешни работи Такеши Иваја ќе ја посети Холандија, каде што ќе учествува на настани поврзани со НАТО и ќе одржи неколку билатерални средби.

Јапонија учествува на самитите на НАТО од 2022 година, кога за прв пат беше поканета по почетокот на војната во Украина.

Само пред три дена, Министерството за надворешни работи соопшти дека Ишиба ќе го искористи форумот за да ја потврди посветеноста на Јапонија на заедничката безбедност во евроатлантскиот и индо-пацифичкиот регион.