Хуманитарна акција во Битола – продажба на уникатни осмомартовски честитки

Штитениците од Заводот за рехабилитација за деца со оштетен слух , говор, глас и други промени во развојот „Кочо Рацин“-Битола во соработка со Лео „Алфа“ и Лајонс клубот „Хераклеа“, викендов организираа хуманитарна акција - продажба на рачно изработени осмомартовски честитки.

Децата од Заводот изработија 100 уникатни празнични честитки, а продажбата на Широк Сокак ја вршеа членовите на лео и лајонс клубот, соопшти Тања Костовска, претседател на Лајонс клубот„Хераклеа“-Битола.

- Се продадоа сите честитки, а собраните средства ќе им бидат доделени на штитениците од Заводот за рехабилитација за деца со оштетен слух , говор, глас и други промени во развојот „Кочо Рацин“-Битола. Според желбата на децата од заводот, средствата ќе бидат искористени за креативни програмски активности, посета на туристички или други забавни институции и објекти надвор од установата во која секојдневно престојуваат, истакна Костовска.