Гугл ќе плаќа надомест за медиумите во Италија

Гугл соопшти дека потпишал серија договори за лиценца со италијанските медиуми, со што се отвора патот за плаќање надоместоци за издавачите, согласно законот утврден со европска директива од пред две години,а што е  слична на авторските права.

Овие договори ќе им овозможат на италијанските издавачи пристап до „Гугл Њуз Шоукејс“ (Google News Showcase), новата програма на Гугл што беше промовирана минатата година, со која на медиумите им се плаќа збогатен избор на содржини.

„Потпишани одделно, овие договори претставуваат важна пресвртница во односот на Гугл со италијанските издавачи, плаќајќи им на издавачите како дел од „Гугл Њуз Шоукејс““, се наведува во соопштението на компанијата.

„Гугл Њуз Шоукејс“ следните месеци ќе биде достапна во Италија“, допрецизира Гугл во соопштението.

-Овие договори претставуваат важен чекор и потврда на посветеноста на Гугл кон италијанските издавачи, изјави Фабио Вакароно, извршен директор на италијанската подружница на Гугл.

Меѓу потписниците на договорот се „RCS MediaGroup“, „Il Sole 24 Ore“, Групацијата „Monrif“, „Caltagirone Editore“, „Il Fatto Quotidiano“, „Libero“, „Il Foglio“, „Il Giornale“, „Il Tempo“, „Ciaopeople“,„ Edinet“, Групацијата „Corriere“, „Citynews“ и „Varese Web“.

-Плаќањето информации, вклучувајќи ги и правата поврзани со дистрибуција на дигитални содржини, се главните теми за кои се бори нашата издавачка група, коментира Џузепе Цербоне, раководител на водечкиот економски весник „Ил Соле 24 Оре“.