Груевски: ПЕТ центарот во Скопје е единствена ваква институција во регионот

ЈЗУ Универзитетски институт за позитронско емисиона томографија (ПЕТ Центар) од денеска и официјално почна да работи со пациенти. Таму ќе може да се дијагностицира дали малигно заболените имаат метастази и точно да се детектира на кое место во нивното тело се за да може потоа да се отстранат.

Ова денеска го посочи лидерот на ВМРО-ДПМНЕ Никола Груевски во одговор на прашање по увидот во градежните активности за изградба на новата зграда на АД ЕЛЕМ, и појасни дека ПЕТ центарот се отвори пред околу осум месеци, но не како дејност, туку како објект без примање пациенти, бидејќи откако ќе се отвори како објект неопходен е период за да се изврши тестирање и лиценцирања од меѓународни овластени институции.

- ПЕТ центарот во Скопје е оспособен за сопствено производство на радиоизотопи поради што ќе биде многу попродуктивен, ќе може да ги продава радиоизотопите на околните држави и ќе биде регионален центар. Луѓето што ќе работат таму се високо остручени, беа испратени на сите можни меѓународни обуки, а во првите неколку месеци со нив заедно ќе работат и експерти од странство. Станува збор за високопрофресионална установа, ретка во европски рамки што ја има само во големи држави, инвестиција од 16 милиони евра која се простира на површина од 2.500 метри квадратни, рече Груевски.

ПЕТ центарот, нагласи, е единствена ваква институција на потегот од Атина до Виена која има и сопствено производство на радиоизотопи.

- Има и некои други во регионот кои ја извршуваат дејноста, но немаат сопствено производство и ги купуваат радиоизотопите кои имаат краток век на траење од само неколку часа. Поради тоа е неопходно да се пренесуваат со хеликоптер за да може да се користат, рече Груевски.