Германскиот претседател ги повика граѓаните да гласаат

Германскиот претседател Франк-Валтер Штајнмаер ја искористи можноста за време на неговото гласање да им се заблагодари на помагачите на изборите, кои во Германија ги има околу 675.000.

Тој ги повика и граѓаните со право на глас да излезат на изборите.

– Искористете го своето право на глас, излезете на гласање и одлучете за иднината на нашата земја со мислата дека вашиот глас може да биде одлучувачки, рече Штајнмаер додека гласаше во берлинско училиште кое, како и многу други во Германија, служи како избирачко место.

Германците денеска избираат 630 пратеници за новиот состав на Бундестагот, додека предизборните анкети покажуваат дека опозициските демохристијани и екстремната десница, исто така опозициска Алтернатива за Германија (АфД) имаат најголема поддршка, но ниту една партија нема да има доволно пратеници за сама да формира влада.

За функцијата нов лидер на Германија се борат четворица кандидати: актуелниот канцелар Олаф Шолц од Социјалдемократската партија (СПД), Фридрих Мерц, кандидатот на главната конзервативна Христијанско-демократска унија (ЦДУ), актуелниот вицеканцелар Роберт Хабек од еколошката Зелена партија и Алис Вајдел од крајната десничарска, антиимигрантска Алтернатива за Германија (АфД).