Евростат: Дизелот во ЕУ во март поскапе речиси 20 отсто

Цените на горивата и на мазивата во Европската Унија во март нагло пораснаа за 12,9 отсто на годишно ниво, при што е забележан особено силен раст на цената на дизелот од речиси 20 отсто, објави денеска Евростат.

Најголемо поскапување е забележано во Германија, каде што цените се зголемија за 19,8 отсто, по што следуваат Романија со 19,6 отсто, Холандија со 18,8 отсто, Летонија со 18,5 отсто и Австрија со 17,2 отсто.

Наспроти ова, Унгарија и Словенија се единствените членки на ЕУ кои забележаа годишен пад на цените на горивата од 2,7 отсто, односно 5,9 отсто.

Во март, цените на дизелот во ЕУ беа повисоки за 19,8 отсто во однос на истиот месец лани, додека бензинот поскапе за 9,4 отсто. На месечно ниво, во споредба со февруари, дизелот во просек поскапел за 19,1 отсто, а бензинот за 10,6 отсто.

Најголем месечен раст на цените на дизелот е регистриран во Чешка и во Шведска, по 27,6 отсто, а потоа следуваат Естонија со 26,8 отсто, Летонија со 25,4 отсто, Белгија со 25,2 отсто и Холандија со 25,1 отсто.

Кај бензинот, најголемо поскапување е забележано во Белгија (15,1 отсто), Шведска (15 отсто), Австрија (14,8 отсто), Чешка (14,6 отсто), како и во Естонија и во Литванија со по 14,2 отсто, се наведува на веб-страницата на Евростат.

МИА