„Етнос“: На грчките острови им се заканува „инфаркт“ поради бегалците

Со доаѓањето на пролетта на грчките острови во североисточниот дел на Егејското Море им се заканува инфаркт од нов прилив на бегалци и мигранти, оценува атинскиот весник „Етнос“.

Весникот повикувајќи се на официјални податоци, наведува дека само во последниве четири дена на островите Лезбос, Хиос и Самос биле регистирани 566 новопристигнати беглаци.

Тоа е најголем прилив на бегалци кон Грција од потпишувањето на договорот меѓу ЕУ и Турција за запирање на бегалскиот прилив во март минатата година. 

- Евентуален поголем прилив со ваков интензитет се заканува да ги доведе островите во состојба на инфаркт, бидејќи во текот на летото е можно бројот на бегалци и мигранти што се наоѓаат на нив двојно да се зголеми во однос на сегашното ниво, пренесува „Етнос“ став на локалните власти, кои стравуваат дека ваквата состојба ќе им ја уништи претстојната туристичка сезона.    

Од минатиот четврток, па до вчера, на Хиос пристигнале 341 бегалец, на Лезбос 195, а на Самос - 30. Властите привеле и еден турски државјанин, криумчар на луѓе, кој на островот Панагија пренел 26 мигранти.