Свет
28. May 2020 - 19:19

Дневен преглед за состојбата со Ковид-19 во светот

Според најновите податоци, во светот со новиот коронавирус досега се заразиле 5.846.624 лица. Од нив починале 359.532, а оздравеле 2.537.267.

-Американскиот претседател Доналд Трамп на својот профил на Твитер објави дека бројот на смртни случаи од Ковид-19 надминал 100 илјади и дека станува збор за „многу тажен биланс на епидемијата“. Бројот на жртви на зарзата во САД е најголем во светот, а 1,69 милиони заразени во САД сочинуваат 30 отсто од сите потврдени случаи во светот.

– Според најновите податоци, 377 лица починале од коронавирусот во Велика Британија во изминатите 24 часа, што е вкупно 37.837 лица, се вели во извештајот на Министерството за здравство и социјална заштита.

– Бројот на смртни случаи од Ковид-19 во Италија во последните 24 часа е 70. За споредба, претходниот ден тие беа 117. Така, вкупниот број на смртни случаи во земјата достигна 33.114. Новоинфицираните за последниот ден се 593 во однос на 584 вчера. Вкупниот број на потврдени случаи во земјата од почетокот на епидемијата пред три месеци е 231.732. Италија е на шестото место во светот по бројот на потврдени случаи по САД, Русија, Шпанија, Велика Британија и Бразил. Со денешниот број има 47.986 луѓе заразени со Ковид-19 во Италија. На интензивна нега има 489 лица. Оздравени се 150.604 луѓе. За вирусот се тестирани 2,330 милиони луѓе.

– Во последните 24 часа во Србија едно лице починало од последиците од коронавирусот. Вкупниот број на жртви од почетокот на епидемијата е 241.Од последниот пресек на состојбата во Србија, 4.534 лица се тестирани за коронавирус, а 25 од нив се потврдени. 6.438 пациенти биле излекувани.

– Во Албанија, во изминатото деноноќие од направените 225 тестирања на сомнителни случаи, позитивен резултат е добиен кај 26 лица, сите од Тирана.Од новодијагностицирани 12 се здравстевни работници и пациенти од универзитеската болница. Вчера во оваа здравствена институција беа регистрирани 13 заразени кои имале контакт со медицинска сестра, кај која болеста е

потврдена пред три дена а била заразена вон клиниката. Вкупната бројка на заразени со Ковид-19 во Албанија се зголеми на 1.076. Во последното деноноќие во списокот на оздравени се впишани уште 11 лица, или вкупно 823, додека починати се 33 лица. Активни на болеста се 220 лица, од кои 24 се на болничко
лекување,од нив тројца на интензивна терапија.

-Во изминатите 24 часа во Грција, регистрирани се два смртни случаи и три нови позитивни случаи на Ковид-19. Од почетокот на епидемијата, вкупно се заразени 2.906 лица, а починаа 175 лица. Досега во Грција се направени 170.467 тестови.

-Министерството за здравство на Кипар соопшти два нови случај на Ковид-19, од направени 2.602 анализи, а бројот на заразени лица се зголеми на 941 од почетокот на епидемијата.

– Во Косово вчера беше потврден само еден нов случај на заразен, седуммина новоизлекувани од Ковид-19 и ниеден починат. Вклучително вчерашните статистики, во земјата досега се регистрирани 1.048 заразени, од кои излекувани се 801 лице, а вкупно се забележани 30 смртни случаи. Вкупно во земјата активни заболени од Ковид-19 се 217 лица. Во текот на вчерашниот ден, на кој се однесува последниот извештај на Институтот за јавно здравство на Косово, извршени се тестирања на 267 лица за кои постоело сомневање дека се заразени, а вкупно, од појавата на епидемијата, се тестирани 13.992 лица. Од денеска во Косово во сила се нови, олеснети, мерки, со кои, меѓу другото, се дозволува неограничено движење на граѓаните од 5 до 21 часот и се отвораат верските објекти, со задолжително почитување на мерките за заштита пропишани од здравствените власти.