Десет кандидати за нов тренер на Рома

Раководството на Рома, како што јавуваат италијанските медиуми, разгледува список со имиња на десет кандидати за тренерското место кое остана празно, откако римскиот клуб вчера му врачи отказ на хрватскиот стратег Иван Јуриќ.

Меѓу фаворитите за нов тренер на Рома се Масимилијано Алегри и Роберто Манчини, но постои опција и за враќање на поранешниот тренер на „волците“ Руди Гарсија, пишува „Кориере дело Спорт“. Французинот ја предводеше Рома до две последователни втори места за време на неговиот прв период на стадионот Олимпико помеѓу 2013 и 2016 година.

Како можни наследници на Јуриќ се споменуваат и Един Терзиќ, Френк Лампард и други.

Рома го отпушти Јуриќ по вчерашниот пораз на домашен терен од Болоња со 2-3 во Серија А. Ова е втора тренерска смена во Рома, откако тимот се раздели со Даниеле Де Роси по четвртото коло.