Црвен Крст - Велес одбележа 70 години од постоењето

Општинската организација на Црвен Крст од Велес со свечена седница во салата „Бели Мугри“ во Велес денеска го одбележа јубилејот - 70 години од своето успешно работење и бројните активности на полето на хуманоста.

Претседателот на ОО на Црвен крст на Велес и воедно на Црвениот крст на Македонија д-р Милчо Трајков во обраќањето до присутните потсети за дел од богатата историја и бројните активности на оваа хумана организација, за помош на граѓаните при разни несреќи, сиромаштија и слично,во сите изминати 70 години.

- Работењето на бројните активисти и волонтери на Црвениот крст е само потврда дека и покрај се имало и се уште има вистински хумани луѓе кои не го изгубиле чувството на човекољубие, потенцира д-р Трајков.

Потсети дека ОО на Црвен крст Велес помага на граѓаните кои останале без работа, на социјалните случаи и ранливи категории на граѓани, работи на превенција и едукација од разни болести и други активности на хуманост за граѓаните.

Голем број од активистите и волонтерите на Општинската организација на Црвен Крст од Велес за својата хумана мисија на денешната свеченост добија признанија и благодарници.

- ОО ЦК Велес е редовно меѓу најдобрите пет во Македонија на планот на крводарувањето. Минатата 2014 година меѓу 34 општински организации беше на второ место во Македонија,потенцира Трајков.