Белата куќа: Трамп целосно ја поддржува офанзивата на Израел во Газа

Американскиот претседател Доналд Трамп „целосно ги поддржува Израел и израелската војска и акциите преземени во последните денови во Појасот Газа“, изјави денеска портпаролката на Белата куќа, Керолин Левит.

- Американскиот претседател јасно му стави до знаење на палестинското движење Хамас дека ќе живеат во пекол ако не ги ослободат сите заложници, а Хамас за жал избра да игра медиумска игра со човечки животи, рече таа.

Портпаролката на Белата куќа додаде дека Хамас „целосно е виновен за оваа ситуација поради неговиот насилен напад врз Израел на 7 октомври 2023 година“.

Палестинското исламистичко движење соопшти дека денеска истрелало ракети кон Тел Авив, што е прв одговор по обновувањето на израелските воздушни и копнени операции во понеделникот вечерта.

Според Цивилната одбрана на Газа, најмалку 504 лица, меѓу кои повеќе од 190 малолетни, се убиени од обновувањето на израелските напади.