Аунг Сан Су Ќи номинирана за член на новата влада на Мјанмар

Јангун, 22 март 2016 (МИА) - Новоизбраниот претседател на Мјанмар Хтин Тјав денеска до Парламентот ја достави листата на 18 кандидати за членови на новата влада.

За многумина изненадувачки е што на листата се најде и лидерот на владејачката Национална лига за демократија, Аунг Сан Су Ќи, која поради уставни ограничувања не можеше да се кандидирана за претседател на државата.

Парламентот на Мjанмар треба да ја одобри предложената министерска листа утре, а ресорите ќе бидат распределени потоа.

Во политичките кругови и медиумите во регионот денеска се појавија шпекулации дека Су Ќи ќе биде формално на чело на Министерството за надворешни работи.

Неспорно е дека таа ќе го има главниот збор и во внатрешната и во надворешната политика на државата која беше под власт на воената хунта од 1962 до минатата година, кога на изборите Националната лига за демократија освои апсолутно мнозинство.