Асад: Џихадистите ја нападнаа Палмира за да го оттргнат вниманието на сириските воени сили од Алепо

Нападот на екстремистичката групација Исламска држава врз Палмира е реакција предизвикана од успесите на сириската армија во борбата против терористите во Алепо и обид да се оттргне вниманието на воените сили од тој град, изјави денеска сирискиот претседател Башар ал Асад во интервју за руската телевизија Ар Ти.

- Тоа е одогвор на случувањата во Алепо, напредувањето на сириската армија и тие сакаат да ја поткопаат победата во Алепо и истовремено да го оттргнат вниманието на сириската армија од Алепо, но тоа не функционира во пракса, рече Асад.

Според него нападот на ИД врз Палмира „не предизивкува интерес“ во западните медиуми.

- Ако ние сепак го ослободиме Алепо од терористите, западните власти и медиумите ќе бидат загрижени за цивилите. Тие не стравуваат кога се случува спротивното, кога терористите ги убиваат тие цивили или ја напаѓаат Палмира и почнуваат да го уништуват човечкото наследство, не само сириското, додаде Асад.