Антикорупциска изрече јавна опомена за судир на интереси

Државната комисија за спречување на корупцијата (ДКСК) денеска изрече јавна опомена за Лавдурим Вејселовски. Комисијата постапувајќи по предмети од областа на судирот на интереси, констатира состојба на судир на интереси кај лицето Лавдурим Вејселовски поради повреда на член 9 од Законот за спречување судир на интереси.

Вејселовски, според ДКСК, покрај функцијата член на Советот на Општина Центар Жупа ја извршувал и функцијата управител на трговското друштво – Градежно, производно и услужно друштво „ВЕЈС-КОМ“ ДООЕЛ експорт-импорт Центар Жупа.

Постапувајќи согласно со одредбите од Законот за спречување судир на интереси, а во насока на отстранување на констатираната состојба, Комисијата се обратила до Вејселовски со барање во рок од 15 дена сметано од денот на приемот на барањето доброволно да се откаже од извршување на едната од двете функции кои истовремено ги извршува.

Вејселовски постапил согласно бараното од страна на Државната комисија, односно направил промена на управителската функција на наведеното трговско друштво, но за нов управител на трговското друштво – Градежно, производно и услужно друштво „ВЕЈС-КОМ“ ДООЕЛ експорт-импорт Центар Жупа, го назначил лицето Цено Вејселовски, кое е негово блиско лице, по што повторно се ставил во состојба на судир на интереси. За таа цел Државната комисија, повторно се обратила до Лавдурим Вејселовски со барање да превземе чекори во насока на отстранување на утврдените повреди на член 9 в.в. со член 3 став 1 алинеја 5 од Законот за спречување судир на интереси, на начин што од ова лице побара во рок од 15 дена сметано од денот на приемот на барањето, да постапи по укажувањето на Државната комисија.

Вејселовски не постапил по барањето на Државната комисија, поради што во согласност со член 23, став 3 од Законот за спречување судир на интереси ДКСК донела одлука на ова лице да му изрече мерка јавна опомена.