Во општина Центар Жупа легализирани 570 дивоградби

Во општина Центар Жупа до сега легализирани се 570 дивоградби или околу 28 отсто од доставените барања.

Во секторот за урбанизам на оваа општина потвруваат дека  во двата рока предвидени за тоа, поднесени се 2.093 барања за легализација.

- Во првиот рок, од 2011 година, според Законот за легализација на дивоградби,  поднесени беа 1.577 барања, додека во вториот рок, по усвојувањето на измените и досполнувањата, од крајот на 2015 до 31 март 2016 година, поднесени се 516 или вкупно 2.093 барања, изјави Шахин Шаќир, раководител на секторот.

Шаќир додава дека од нив позитивни решенија добиле околу 28 отсто, мал број се во постапка, додека дури 90 проценти од нерешените се со некомплетирани документи, односно недоставен геодетски елаборат.

Тој потсетува дека за барањата поднесени во периодот 2011 година, рокот изминува на 31 декември годинава, додека  крајниот рок за легализација на објектите за кои барања се доставени во периодот 2015/2016 година, е 31 декември 2017 година.

- Очекуваме поголемиот број од заостантите барања доставени во првиот рок да бидат докомплетирани по 20-ти декември кога во родниот крај доаѓаат нашинците кои живеат и работат во западно европските земји,главно во Италија,Германија и Швајцарија,- посочува Шаќир.