Во Ниш ќе се одржи централен дел од сенароден собир, Вучиќ најави претставување на нова програма за Србија

Во Ниш денеска ќе се одржи централна манифестација во рамки на Сенароден собор што го свика претседателот на Србија, Александар Вучиќ. На собирот ќе биде промовирано Движењето за народот и државата.

Српскиот претседател ги повика граѓаните од државата да дојдат да демонстрираат на мирен и достоинствен начин дека пристојна Србија не може да биде поразена. Тој најави дека на собирот „ќе се покаже како функционира една пристојна и нормална Србија и каде никој нема да биде нападнат“.

Неговото обраќање ќе биде во 18 часот.

Соборот почна синоќа и ќе трае до недела. Се очекува во неговото обраќање, како што најави, да изнесе идеи за тоа како треба да изгледаат Србија и Ниш во иднина.

Тој им се заблагодари на сите граѓани кои веруваа во она што го прави и кои го поддржуваат.

Движењето за народот и државата беше претставено во Белград од 11 до 13 април на митингот „Не ја даваме Србија“.

Во Ниш во 18.30 часот мирен протест закажаа и студентите во блокада од тој српски град. Тие, исто така, ги повикаа сограѓаните да дојдат на протестот „мирно, со достоинство и со позитивна енергија“.