Вее снег во Кичево

Снегот кој во Кичевскиот регион врнe непрекинато повеќе од 48 часа, создаде големи потешкотии во нормалното одвивање на секојдневието на населението и најмногу го отежнува одвивањето на сообраќајот, но надеж преставува тоа што денеска врне снег со послаб интензитет. Височината на снежната покривка изнесува од 50-тина сантиметри до еден метар во зависност дали се работи за пониските делови од овој регион или за ридско-планинските села.

 

Инаку екипи задолжени за зимско одржување, редовно ги чистат главните патишта во регионот, со цел сообраќајот да се одвива без застој.

 

-Во нашата општина за чистење на снегот од патиштата ангажирани се 23 машини од кои 11 се ангажирани во северниот регион, јужната регија се расчистуваа со 6 машини, а со исто толку машини ЈП „Комуналец“ ги чисти улиците во градот. Ако нема нови снежни врнежи, планираме во текот на денешниот ден целосно да бидат исчистени патиштата и до најоддалечените планински села во нашата општина вели портпаролот Емин Насуфи.

 

Тој посочи, дека мал проблем претставува чистењето на патиштата до планинските села Бериково, Папрадиште, Ново Село и Калешовци, кои во текот на денешнот ден, се надева, ќе бидат пробиени. Истовремено, потенцира, ќе бидат исчистени и патиштата и низ селските населби.