Македонија
11. February 2016 - 13:21

Украдени знаците што ја регулираат пловидбата на Охридското Езеро

Триесеттина знаци за езерска пловидба што беа неодамна поставени за регулирање на сообраќајот на Охридското Езеро, се украдени од страна на непознат сторител/ли.

Според информациите од Капетанијата на пристаништа во Охрид, станува збор за алуминиумски знаци поставени долж македонската страна на крајбрежјето на Охридското Езеро на потегот од Радожда до Љубаништа, чија вкупна вредност изнесува неколку илјади евра.

Бидејќи знаците не можат да бидат употребени на друг начин освен како секундарна суровина, надлежните служби апелираат до откупувачите на метал да се пријави евентуалниот обид знаците да бидат продадени како стар алуминиум.

Инаку, Капетанијата на пристаништа на РМ најавува дека знаците повторно ќе бидат поставени на соодветните места, оттаму што станува збор за безбедноста на пловидбата на Охридското Езеро.