Трамп: Добри односи со Путин, го навредуваат обвинувањата за изборите

Претседателот на САД, Доналд Трамп по пристигнувањето во главниот град на Виетнам, Ханој денеска, изјави дека има добри односи со рускиот претседател Владимир Путин, за која рече дека „е навреден поради обвинувањата за мешање во претседателските избори во САД".

Трамп оцени дека многу животи ќе бидат спасени со договорот што  утринава го постигна со Путин во врска со Сирија, за време на кусата средба на маргините на вториот ден од самитот на Азиско- пацифичката  економска соработка (АПЕК) во Виетнам.

 -Брзо се договоривме. Тоа ќе спаси голем број на животи, изјави Трамп.

Во заедничкото соопштение двајцата претседатели, Трамп и Путин, ја потврдија нивната решеност да се борат со Исламската држава со цел да се постигне конечна победа над неа, како и да се почитува суверенитетот, независноста и територијалниот интегритет на Сирија.