Русија почна голема воена вежба во јужниот дел на земјата

Русија, со значителни воени сили, денеска почна голема воена вежба во југозападниот дел од земјата, пренесоа американските медиуми.

Рускиот министер за одбрана, Сергеј Шојгу, изјави дека рано утринава, на самиот почеток на воената вежба, некои од воздухопловно-десантните единици и воено-транспортната авијација беа ставени во состојба на борбена тревога.

На вежбата учествуваат војници и единици од рускиот Јужен воен округ. 

Округот во себе вклучува војници и единици распоредени на Кримскиот Полуостров, што Русија пред две години го анексира од Украина, како и единици од Северен Кавказ и југозападните области крај границата со Украина.

Според Шојгу, вежбата има за цел да ја провери подготвеноста на војската да одговори на терористички закани и на другите предизвици.