Свет
4. September 2015 - 18:12

Путин: Сиријците не бегаат од режимот на Асад, туку од ИД

Рускиот претседател Владимир Путин денеска изјави дека неговиот сириски колега Башар Асад е подготвен да организира вонредни парламентарни избори и да и дозволи на една „корисна опозиција“ да учествува во управувањето на земјата.

- Постои заедничко разбирање дека обединувањето на силите во борба против тероризмот треба да се движи паралелно со развојот на некаков политички процес во Сирија, истакна Путин на маргините на Источниот економски форум во Владивосток.

Според него, „Асад се согласува со спроведување вонредни парламентарни избори, како и со воспоставување контакти со т.н. „здрава опозиција“ и нејзино учество во управување со земјата“.

- Тоа е пред се сириско внатрешно прашање. Ние ништо не наложуваме, но се обидуваме да го зајакнеме тој внатрешен сириски дијалог, нагласи рускиот претседател.

Путин истакна дека Сиријците не бегаат од режимот на Асад, туку најмногу од терористичката група Исламска држава, која контролира големи територии во Сирија и Ирак.

- Ние сфаќаме дека се потребни политички промени и работиме со нашите партнери во Сирија, нагласи Путин.