Балкан
10. October 2016 - 8:38

Пленковиќ попладне ќе добие мандат за состав на новата хрватска Влада

Претседателот на Хрватска демократска заедница (ХДЗ), Андреј Пленковиќ, денеска попладне од претседателката на Хрватска, Колинда Грабар Китаровиќ, ќе добие мандат за состав на новата хрватска Влада, откако со потписи ќе докаже дека ја има поддршката на просто мнозинство од избраните пратеници. 

Пленковиќ ќе ја посети хрватската претседателка откако е постигнат договор за составување на Влада меѓу ХДЗ и Мост, со поддршка на националните малцинства и други партии, и како што се очекува, ќе и предаде повеќе од 90 потписи за поддршка да биде мандатар на новата хрватска Влада, јави Хина. 

Откако ќе го прифати мандатот, според Уставот, Пленковиќ е должен во рок од 30 дена на Саборот да му ја претстави новата програма на Владата и нејзините членови како и да побара гласање за доверба.