Охриѓани ја продолжија традицијата, одбележан Денот на рибарите
Со греана ракија и капење во водите на Охридското Езеро на плажата Сараиште денеска охриѓани ја продолжија традицијата за одбележување на Денот на рибарите. Во студените езерски води заплива и фаќачот на крстот Васко Довлев со тајфата придружувани и од други верници.
Денот на рибарите е вековна традиција во Охрид, која порано, во времето кога било забрането фрлање на светиот крст за Богојавление – Водици, била искористена и за осветување на езерските води. Охриѓани за да го прикријат фрлањето на светиот крст, тоа го правеле во раните утрински часови на Свети Јован Крстител, денот кога рибарите го означувале почетокот на риболов на Охридската пастрмка.
– Овој ден е значаен за рибарите зошто во минатото беше забрането да се фрла крстот за Водици и луѓето го поместиле еден ден покасно за да бидат послободни и како Ден на рибарите да си го слават. Важно е да се негува оваа традиција. Порано имаше повеќе рибари, ловевме со мрежи, вели охриѓанецот Ѓоко Трајчески, кој памети дека ловеле по два до три тона плашица.
И Наум Секулоски се присетува дека порано ловеле многу риба и покрај со греана ракија Денот го одбележувале и со рибина чорба.
– Сега нема ловење, нема риба. Тогаш преку спортско риболовно друштво си вадевме дозволи и во недела одевме по риба, беше дозволено да се уловат три парчиња, ако е помало парчето од 300-400 грама требаше да се врати во вода, раскажува Секулоски.
Помладите охриѓани сметаат дека традицијата треба да продолжи и да се негува, за што велат дека е потребна поддршка од институциите.
Славењето на Денот на рибарите беше дополнето со старогратската песна во изведба на Охридскиот музички еснаф, но годинава без традиционалната рибина чорба.
Ново на Сител
-
ДЗС: Струјата во второто полугодие лани поскапела за 8,2 отсто
-
СДСМ: Нема ништо ново во понудата на ВМРО-ДПМНЕ
-
И Италија ќе го чува македонското небо
-
Објавен конкурсот за уписи во средно училиште
-
Битолчанка пронашла граната додека копала нива
-
До вторник сончево и топло до 29 степени
-
Нето надворешниот долг на крајот на 2023 година изнесувал 4.458 милиони евра
-
Тетовци се жалат дека не можат да излезат од дома поради глутниците