Македонија
11. April 2017 - 17:51

Обвинителен предлог за лицето што го симна знамето на Република Македонија во Куманово

Кумановското Јавно обвинителство до Основниот суд – Куманово поднело обвинителен предлог против Л.К. за сторени кривични дела „напад на службено лице при вршење на јавна безбедност“ и „предизвикување национална, расна и верска омраза, раздор и нетрпеливост, соопшти Јавното обвинителство.

Малолетниот Л.С денеска е сослушан пред судија за малолетници при Основниот суд во Куманово и за него ќе продолжи постапката со изведување докази.

- На 31-ви минатиот месец на улицата „Гоце Делчев” во центарот на Куманово, околу 16:00 часот, обвинетиот заедно со неколку непознати лица и малолетниот Л.С. го симнале и го оштетиле знамето на Република Македонија и на јарболот закачиле знаме на Република Албанија. При обид да бидат спречени во намерата од страна на службени лица од Министерството за внатрешни работи, обвинетиот нападнал еден од полицајците и му нанел телесна повреда – набиеница на главата и десната шака. Настанот предизвика чувство на раздор и нетрпеливост врз основа на етничка припадност кај јавноста, стои во соопштението.

Од Јавното обвинителство посочуваа дека имајќи предвид на тоа што станува збор за кривично дело од јавниот ред и постојат околности што го оправдуваат стравот дека доколку обвинетиот се брани од слобода ќе го повтори кривичното дело, надлежниот обвинител од кумановското Основно јавно обвинителство со обвинителниот предлог доставил и посебен предлог за продолжување на определените мерки – куќен притвор и мерки на претпазливост.