Македонија
4. January 2016 - 16:05

Нов фекален колектор на булеварот „Видое Смилевски-Бато“

Премиерот Никола Груевски и градоначалниците на Град Скопје и на Аеродром Коце Трајановски и Ивица Коневски денеска присуствуваа на почетокот на градежните работи за изградба на нов фекален колектор на булеварот „Видое Смилевски-Бато“. 

Инвестицијата е вредна 27 милиони денари, а треба да заврши за околу три месеци. Инвеститор е Град Скопје, а изведувач „Бауер БГ“ од Скопје. 

- Во колекторот инвестира Град Скопје, а ќе се реши голем проблем во делот на фекалната канализација, особено во Реонски центар во општина Аеродром, за зградите што ги гради компанијата „Џеваир Холдинг“. Ќе го реши проблемот и на многу околни згради, рече Груевски. 

Градоначалникот Трајановски појасни дека фекалната канализација е долж булеварот „Видое Смилевски-Бато“, почнувајќи од булеварот „Февруарски поход“ до булеварот „Србија“, во должина од 771 метар.

- Ќе се постави фекална канализација со дијаметар на цевки од 800 милиметри. Длабочината на оваа фекална канализација во најдлабокиот дел ќе биде околу 6,5 метри, а во најплиткиот дел, кај булевар „Србија“ 5,5 метри, рече Трајановски.

Тој додаде дека на оваа фекална канализацијата ќе треба да се приклучат сите нови згради, на „Џеваир Холдинг“ и зградите во поранешната касарна во општина Аеродром.  

Градоначалникот Коневски нагласи дека ова е многу значаен проект за општина Аеродром.

- Веќе ја направивме секундарната фекална канализација во делот на Реонски центар. Со изградбата на овој фекален колектор секундарната фекална канализација ќе се приклучи и ќе биде во функција на сите оние нови објекти што се градат во Реонски центар Аеродром, истакна Коневски.