Македонија
17. September 2021 - 15:07

Николовски-Итала: Македонија во 2022 година ќе може да аплицира за Заедничката програма на ЕУ

Заменик-претседателот на Владата задолжен за борба против корупцијата и криминалот, одржлив развој и човечки ресурси Љупчо Николовски денеска во Брисел одржа работен состанок со директорот на канцеларијата на Европската комисија за борба против измама (OLAF), Вили Итала.

Ова е прв официјален состанок на вицепремиерот Николовски и директорот Итала, на којшто Николовски ја презентирал улогата на Кабинетот во процесот на координација и заедничко дејствување на институциите во борбата против корупцијата, како и тековните и идни мерки за сузбивање на корупцијата.

На состанокот било посочено значењето на соработката со ОЛАФ како единствен и главен орган на ЕУ, овластен да открива и истражува измами поврзани со фондовите на ЕУ, да ја истражува корупцијата и прекршувањето на законите од страна на персоналот на ЕУ и членовите на институциите на ЕУ.

Николовски, како што соопшти неговиот Кабинет, посочил дека проактивната борба против организираниот криминал и корупцијата останува фундаментална во сузбивањето на криминалната инфилтрација на политичките, правните и економските системи.

– За нас, како земја кандидат за членство во ЕУ, е од особена важност поддршката и соработката со сите органи на Европската Унија, особено со ОЛАФ, со цел ефикасно исполнување на препораките во делот на политиките и мерките за борба против корупција и организиран криминал. Водејќи се од основните вредности на ЕУ кои вклучуваат владеење на правото и почитување на човековите права, како Влада остануваме силно посветени на трасираниот пат за искоренување на корупцијата и криминалот, во што од огромно значење се препораките и искуствата што ги добиваме од Европската Унија и органите во нејзин состав, истакнал Николовски.

Генерaлниот директор на ОЛАФ го запознал вицепремиерот Николовски со новите регулативи на ОЛАФ за Европско јавно обвинителство (ЕППО)  како и за Заедничката програма на Европската Унија за борба против измами. Посочил дека ОЛАФ ја цени и поддржува заложбата на државата особено на вицепремиерот во борбата против корупцијата со сите системски и превентивни мерки.

Директорот на ОЛАФ порачал дека Македонија во 2022 година ќе може да аплицира и  да биде дел од најновата Заедничка програма на Европската Унија за борба против измами (2021-2027), која за овој период има буџет од околу 181 милион евра. Целта на програмата е заштита на финансиските интереси на Европската унија преку поддршка на акциите за борба против нерегуларностите, измамите и корупцијата што влијаат врз буџетот на ЕУ, поддршка на меѓусебна помош помеѓу административните органи во земјите членки на ЕУ и обезбедување правилна примена на законот за царински и земјоделски прашања преку поддршка на соработката помеѓу административните органи во земјите членки на ЕУ и Европската Комисија.

 

Програмата обезбедува финансирање, особено за опрема за техничка и оперативна истрага, специјализирани активности за обука и истражување, за поддршка на заштитата на финансиските интереси на ЕУ. Финансирањето е обезбедено во форма на грантови и набавки.