Свет
22. January 2016 - 8:53

Најмалку 20 мртви во терористички напад врз ресторан во Могадишу

Најмалку 20 лица, меѓу кои и жени и деца, се убиени во  напад на припадниците на исламистичката група ал-Шабаб врз популарен ресторан крај морето во Могадишу, главниот град на Сомалија, информира денеска локалната полиција.

- Полицијата утринава успеа да „ја преземе контролата врз ресторанот, изјави полицискиот капетан Мохамед Хусеин, пренесува Танјуг.

Додека сомалиските специјални сили ги пребарувале просториите на ресторанот оттаму се слушале експлозии и пукање.

Хусеин наведе дека безбедносните сили спасиле многу заробени лица во холот на ресторанот, каде синоќа, во моментот на нападот, имало прослава.

Сведоци на настанот истакнуваат дека напаѓачите извикувале „Алах екбар“ (Бог е голем) и дека потоа влетале во ресторанот.

-Во луѓето кои седеа во близина на плажата пукаа на невидено, а потоа влетаа во ресторанот, изјави очевидецот Ахмуд Нур, кој се шетал по плажата.

Исламистичката екстремистичка група ал-Шабаб ја презеде одговорноста за нападот.

Агенциите пренесуваат дека во нападот учествувале пет лица и дека пред влезот во ресторанот активирале бомба.

Министерот за безбедност, Омар Мохамед, изјави дека четворица од напаѓачите се убиени, а петиот е уапсен.