Над 54.000 жители на истокот на Индонезија со проблеми при дишењето поради загадениот воздух

Над 54.000 жители во источниот дел на Индонезија, каде што речиси два месеци беснеат пожари, побарале лекарска интервенција поради проблеми со респираторниот систем и очите.

Во првото официјално соопштение од здравствените власти денеска се нагласува дека лекарите дијагностицирале 44.960 случаи на акутни заболувања на органите за дишење, над 2.700 посериозни проблеми со видот и дури 769 случаи на пневмонија.

Во подрачјата на островите Суматра и Калимантан, каде што од почетокот на месецев се регистрирани над 600 поголеми пожари има над 36 милиони жители, а поради високата концентрација на чад во воздухот прогласена е вонредна состојба.

Од средината на септември во овој дел на Индонезија се затворени училиштата и градинките, а маските за лице се најбараниот производ.

За гаснење на пожарите на истокот, Индонезија испрати и десетина илјади војници и полицајци, кои им помагаат на локалните пожарникари и населението. Во гаснењето учествуваат и голем број авиони и хеликоптери, но за сега пожарите само успешно се локализираат.

Поради долгата суша и структурата на растенијата во регионот, обично богати со масло, пожарите и натаму лесно избиваат.

Од облаците чад што доаѓаат од Индонезија, значително над нормалата е зголемена концентарцијата на опасни материи во воздухот и во Сингапур и поголем дел на Малезија. Жителите на овие подрачја не излегуваат на улица без маски на лицето, а во Куала Лумпур и појужните градови во Малезија децата најчесто остануваат дома.

Како куриозитет, но мошне сериозно, друштвата за заштита на животните во Сингапур побараа маски за дишење да им се врзат и на големиот број мајмуни во зоолошките градини. Властите ветија дека тоа ќе го сторат од понеделник, ако сосотојбата со смогот не тргне кон подобро.