Бизнис
24. јуни 2020 - 16:41

На аеродром ќе нема испраќање, ќе се пристигнува 3 часа порано

Нема веќе испраќање и дочекување во аеродромската зграда. Од среда аеродромите по повеќе од три месеци ќе почнат со работа, но внатре ќе можат да влезат само патниците. Концесионерот ТАВ Македонија ги објави новите правила.

Од среда за полетување ќе треба да се пристигне на аеродром три часа пред летот, заштитната маска е задолжителна, во чекалната ќе може да се седи на растојание за што седиштата се соодветно обележани, хигиената мора да се одржува на високо ниво.

Ќе се користи само еден влез за патници, патникот со маска тука ќе ја покаже картата, па преку патосница за дезинфекција на чевлите ќа влезе и ќе се дезинфицира, потоа ќе му биде измерена температура, па ќе може да продолжи кон шалтерите за регистрација.

Заради новите правила процедурите ќе бидат побавни затоа менаџментот на ТАВ препорачува патниците да ја користат онлајн регистацијата 24 часа пред полетување.

Дезинфекцијата е задолжителна и при упатувањето кон патничкиот мост и при влегување во авион.

Од ТАВ информираат дека ги следат сите меѓународни протоколи, често ќе се врши дезинфекција на сите површини, а насекаде низ аеродромите ќе бидат поставени информативни знаци во вид на банери, налепници и билборди со насоки за патниците и вработените за заштита од корона вирусот.