Свет
11. April 2022 - 9:26

Министрите за надворешни работи на ЕУ ќе разговараат за поголема помош за Украина

– Министрите за надворешни работи на земјите од ЕУ денеска во Луксембург разговараат за дополнителни опции за поддршка за Украина.

На маса, меѓу другото, е и предлогот на еврокомесарот за надворешни работи Жозеп Борел да се обезбедат дополнителни 500 милиони евра за испорака на оружје и друга воена опрема.

Веројатно на состанокот ќе се зборува за можни дополнителни санкции против Русија заради агресијата врз Украина. Меѓу другото ќе се разговара и за ембарго на увоз на руска нафта, по воведената забрана за увоз на рускиот јаглен.

Минатиот петок Борел заедно со претседателката на Европската комисија Урсула фон дер Лајен го посетија украинскиот главен град Киев, за да дадат уверување до властите во Киев и до украинскиот народот за целосната солидарност на ЕУ.

Борел јасно стави до знаење јасно ја гледа потребата од дополнителни санкции за рускиот енергетски сектор, посочувајќи ја притоа руската нафта.

Се проценува дека во ЕУ секој ден се троши руска нафта во вредност од 450 милиони евра.

Инаку, други теми за кои ќе се разговара на состанокот во Луксембург се и ситуациите во Мали, Либија и Јемен. Дополнително, ќе се разговара и за Иницијативата за Глобална порта започната минатата година, а со цел промовирање на меѓународното влијание на ЕУ.