Куманово го одбележува Денот на ослободувањето и пет века постоење

Куманово денеска одбележува 75 години од ослободувањето и пет века постоење. Во рамки на програмата за одбележување на празникот, претставници од општина Куманово и бројни делегации ќе положат цвеќе на Спомен Костурницата.

На свечената седница на советот на општината, градоначалникот Максим Димитриевски ќе ги додели овогодинешните ноемвриски награди на три физички и два правни субјекти на педијатарот Хасан Хасани, Радомир Гелевски, лекар специјалист по абдоменална хирургија, историчарот Димитар Масевски, Женскиот Ракометен клуб Куманово и училиштето „Крсте Мисирков“.

Вчера, во рамки на бројните манифестации и настани, градоначалниците на Куманово и Нови Сад, Максим Димитриевски и Милош Вучевиќ потпишаа договор за збратимување, со кој се предвидува интензивната соработка на двата града во повеќе области, наука, образование, туризам, спорт, во реализација на програми од социјалната заштита, урбанизмот и комуналната дејност. На прославата на значајниот јубилеј присутни се повеќе делегации од збратимени градови од повеќе држави.

Во рамки на одбележувањето, викендов беа отворени две традиционални ликовни колонии „Карпино“ и повеќедецениската „Кумановски ликовни уметници“ на која се презентираа дела на дваесетина кумановски академски уметници.

Во рамки на спортските активности се организираа бројни турнири во фудбал, ватерполо, атлетска трка на градскиот плоштад.

Изминатиов викенд на плоштадот настапија повеќе локални, македонски и пејачи од земјите од соседството.