Кога ќе има вакцини за сезонски грип?

Не се знае кога ќе пристигнат вакцините против сезонскиот грип. Министерството за здравство нарачало 40.000 дози на четиривалентните вакцини, но оттаму велат дека достапноста и испораката на вакцините ќе зависи од производителите. Сите овие вакцини, според здравство, се наменети за бесплатна вакцинација.

- Доколку има потреба МЗ ќе набави дополнителни количини. Согласно препораките на Комисијата за заразни болести, МЗ ќе обезбеди бесплатна вакцинација против сезонски грип на следните ризични групи:

- Стари лица (над 65 години)

- Лица со хронични заболувања

- Здравствени работници

- Бремени жени

- Децата на возраст од 6 месеци до 5 години

Комерцијалните вакцини против грип ги набавуваат Центрите за јавно здравје од сопствен буџет и истите ја одредуваат цената на вакцината, велат од Здравство.

Граѓаните кои се вакцинирале против Ковид две недели по примената втора доза може да се вакцинираат и против сезонскиот грип. Ваква препорака издала Комисијата за имунизација.

Сепак, приватните матичните лекари се жалат дека Министерството не ги известува навремено за набавките на вакцини. Пациентите бараат термини, а тие не знаат што да прават бидејќи не се информирани дали и кога ќе пристигнат.

Претседателката на Здружението на приватните лекари, д-р Дервишова во гостувањето во „Магазин – Здравје“ рече дека вакцините против сезонски мора да бидат бесплатни.

-Мојот став и и ставот на сите нас. И ние докторите сме пациенти, ако плаќаме здравствено осигурување треба да знаеме за што плаќаме. Стварно мислам дека Министерството за здравство треба да го покрие тој трошок бидејќи луѓето плаќале здравство. И сега очекуваат кога се тие ризична категорија дека треба навистина тука тој трошок да го покрие бидејќи луѓето се исцрпија изминативе две години од давање пари за приватни лаборатории, за приватни лекувања, за лекови кои им го спасиле животот од Корона и сето тоа. Ете еден апел до Министерството за здравство да размисли дали може тој трошок да се покрие зашто тоа се луѓе дијабетичари и сепак е добро за ризичните групи, вели д-р Лилијана Чолакова Дервишова.

Лани вакцинацијата против сезонскиот грип доцнеше и почна кон средината на ноември. Пациентите кои тогаш немаа термини преку матичен лекар беа принудени да платат 800 денари во Центрите за јавно здравје.