Македонија
12. November 2019 - 9:16

Јавна дебата „Самоорганизирани стратегии за прехрана наспроти климатските промени“

Граѓанската организација „Зелената арка“ денеска организира јавен дијалог на тема „Облиците на граѓанска самоорганизација за постигнување прехранбен суверенитет наспроти климатските промени“.

Ова е втор јавен настан од проектот „Агриколаб – платформа за колаборативни агроеколошки пракси“, чија цел, како што информираат организаторите е да создаде начини за соработка и споделување знаења меѓу граѓаните и научните институции за одгледување хранливи растенија во (при)градските подрачја наспроти предизвиците од климатските промени.

– Очекуваме дека благодарение на заедничкиот придонес од сите учесници во дијалогот ќе преиспитаме што значи прехранбениот суверенитет во контекстот на климатските промени. Исто така, ќе се обидеме заеднички да ги изнајдеме најсоодветните начини за понатамошна самоорганизација со стремеж кон
прехранбениот суверенитет, посочуваат од „Зелената арка“.

Проектот „Агриколаб“, освен јавните дијалози во следните фази нуди и обука за агроеколошките аспекти на пермакултурниот дизајн во (при)градските подрачја.