Изминатата седмица во Охрид 27, во Струга 54 и во Дебар осум потврдени случаи на КОВИД-19

Седмичниот билтен на Центарот за јавно здравје од Охрид што ги опфаќа општините Охрид, Дебрца, Струга, Вевчани, Дебар и Центар Жупа покажува дека во периодот од 18 до 24 јули лабораториски е дијагностицирано присуство на КОВИД-19 кај 27 лица од Охрид, 54 лица од Струга и осум лица од Дебар.

Изминатата седмица од вкупно земени 322 материјали за испитување 243 се собрани според епидемиолошки индикации (лица кои исполнуваат критериуми за дефиниција на случај) (Охрид и Дебрца 86, Струга и Вевчани 71, Дебар и Центар Жупа 77), а 88 материјали зе земени при скрининг тестирањето со упат од матичен лекар и тоа само од Охрид и Дебрца.

Во Охрид има 111 активни случаеви на КОВИД-19, во Струга 176, а во Дебар 20 пациенти. Во односниот период оздравени се 36 лица од Охрид, 25 лица од Струга и едно лице од Дебар. Изминатата седмица се регистрирани два смртни случаи поврзани со КОВИД-19, и двата од Општина Струга.

Кога станува збор за вкупниот биланс од почетокот на епидемијата заклучно со вчерашниот ден КОВИД-19 е регистриран кај вкупно 844 лица во односните општини и тоа 258 лица во општините Охрид и Дебрца, 404 лица во општините Струга и Вевчани и 182 лица во општините Дебар и Центар Жупа. Оздравени пациенти од Охрид се 149, од Струга се 182, а од Дебар и Центар Жупа се 62 пациенти. Во Охридско починати се седум лица, во струшко 41, а во Дебар и Центар Жупа пет лица.