Балкан
28. April 2017 - 8:51

Грција очекува до недела да има исчекор во преговорите со кредиторите

Грција очекува до крајот на оваа недела да се постигне исчекор во преговорите со нејзините кредитори, со што ќе се овозможи доделувањето на следната транша од кредитите за земјата, јавија грчките медиуми.

Портпаролот на грчката Влада, Димитрис Џанакопулос, за грчката државна телевизија оцени дека е можен исчекор до крајот на неделата, а според него останува да се постигне согласност единствено по серија технички детали, пренесоа американските медиуми.

- Одлучивме да отвориме седум-осум теми и останаа само неколку од нив, што во целина е можно како преговарачки теми да се завршат до недела и да се постигне спогодба, изјави овој владин извор, цитиран од грчкиот весник Њуз.ин, по завршувањето на средбата на ресорните министри со шефот на меѓународните кредитни институции.

Џанакопулос додаде дека на средбата биле разгледувани прашања поврзани со приватизацијата, финансиите и работното законодавство.

Според него, денеска се очекува двете страни да разгледаат четири работни текста, така што до крајот на неделата би требало да заврши договарањето на мерките, што кредиторите ги бараат, а кои се услов за доделување на следната транша од кредитите за Грција.