ЕУ и Косово потишаа Спогодба за стабилизација и асоцијација

Европската унија и Косово денеска потпишаа Спогодба за стабилизација и асоцијација, пренесе ТАСС.

Претставниците на двете страни ги ставија потписите под документот за време на сесијата на Европскиот Парламент во Стразбур, прецизира агенцијата.

Ова е историски чекор што ќе помогне во економскиот раст на една од најсиромашните држави во Европа,забележаа американските медиуми.

Со денешното потпишување се отвора патот за евентуално полноправно членство на Косово во ЕУ, кое е главниот трговски партнер на оваа нова држава.

Министерот за европска интеграција Беким Чолаку изјави дека спогодбата е „нов меѓник затоа што утврдува договорни односи меѓу Република Косово и ЕУ“.

-Ние сакаме да станеме членка на европското семејство од гледна точка на економската интеграција, но сакаме, исто така, да ги споделуваме и вредностите на ЕУ, рече Чолаку во интервју за Асошиетед прес.

Косовскиот премиер Иса Мустафа вчера на еден форум изјави дека спогодбата е „почеток на долгиот пат......поддржан и преземен од нашите граѓани и нашите пријатели“.

Во 2014 година земјите од ЕУ  беа главниот трговски партнер на Косово со 30,2 проценти од неговиот извоз и 42,6 отсто од увозот, во вкупна вредност од 1,2 милијарда евра.

-Спогодбата ќе ја засили конкуренцијата, а локалните компании ќе имаат можност да извезуваат во земјите на ЕУ без царински тарифи, посочи Беким Чолаку.

Тој им заблагодари на сите држави од ЕУ, вклучувајќи и на оние кои не ја признаваат независноста на Косово, за разбирањето „дека единствениот начин за зацврстување на мирот, стабилноста и соработка во Западен Балкан е преку  отворање на вратите пред останатите држави од Западен Балкан за приклучување кон ЕУ“.