ЕК: Жалиме што Србите во Косово не можеа да гласаат на референдумот
Европската Комисија денеска изрази жалење што Србите кои живеат во Косово не беа во можност да гласаат на вчерашниот референдум и повика двете страни да изнајдат решение, јави дописничката на МИА од Брисел.
Српските граѓани вчера гласаа на референдум за уставни измени поврзани за реформите во судството потребни за членство во ЕУ, но косовскиот парламент претходно донесе резолуција со која им се забранува на етничките Срби кои живеат на косовска територија да излезат да гласаат.
Европската Комисија денеска преку портпаролот Петер Стано изрази жалење.
– Позицијата на ЕУ е јасна дека сите Срби кои можат да гласаат требаше да ја имаат таа можност и жалиме што не беше возможно да се изведе оваа операција со олеснување на ОБСЕ, вакви операции имало и во минатото. Ова е навистина жално, но потребна беше согласност од двете страни за да биде изводливо, изјави Стано.
Комисијата ги повика двете страни што е можно побрзо да седнат на преговарачка маса и да се договорат за модалитетите за учество на Србите во Косово на следните избори кои ќе се одржат на почетокот на април оваа година.
Европската унија уверува дека иако нема средби на високо ниво во рамките на Дијалогот помеѓу Белград и Приштина „тој сѐ уште е жив“.
– Постојано сме ангажирани со двете страни, но не ги користиме медиумите за пораки, има избори во април и сакаме решение пред изборите, но ќе ги задржиме роковите во рамките на нашата дискретна комуникација со партнерите, додаде Стано.
Ново на Сител
-
Пожар зафати куќа во неготинско Долни Дисан
-
Врховен задутре ќе одржи јавна седница по жалбата на таткото на Вања против мерката притвор
-
Минималната синдикална кошница за април 60.212 денари, зголемена за 1.214 денари во однос на март
-
Цената на лебот засега е стабилна и нема да се менува, велат од Агро-бизнис комората при ССК
-
МВР, ЈО и АНБ комплетно подготвени за претстојните претседателски избори
-
Инаугурацијата на Путин ќе се одржи на 7 мај
-
Шојгу: Русија ќе ги интензивира нападите врз складишта со западно оружје во Украина
-
Просечната плата во февруари изнесува 39.276 денари