Македонија
11. October 2021 - 16:19

ЕК: Договорот со Фронтекс не може да се потпише поради македонскиот јазик

Од Европската Комисија за МИА потврдија дека договорот за управување со границите помеѓу ЕУ и Македонија останува блокиран од страна на Бугарија затоа што оваа земја не го признава македонскиот јазик, јавува дописничката на МИА од Брисел.

Договорот со агенција на ЕУ, позната и како Фронтекс, е заглавен три години, Бугарија одбива да го потпише поради јазичната клаузула.

Овој договор, потпишан со останатите земји од регионот, треба да и овозможи на ЕУ во случај на бегалска криза, на пример, да распореди свои полициски офицери на македонската граница, заедно со домашната полиција.

Во услови на стравувања во Европската Унија поради состојбата во Авганистан, договорот со Македонија сепак останува непотпишан затоа што Софија не ја прифаќа клаузулата на крајот на документот каде се наведуваат јазиците на кои е потпишан.

Сите други земји ја имаат оваа клаузула каде се наведени јазиците, во случајот на Босна и Херцеговина се наведени сите три официјални јазици. Но, Бугарија бара да стои „јазиците на страни потписнички“, што е неприфатливо за македонската страна, бидејќи Македонија би била во тој случај единствена земја за која не е наведен јазикот.

Од правен аспект, како што објаснуваат во Брисел, непотпишувањето на договорот со Фронтекс значи дека доколку утре се случи нова бегалска криза како во 2015, Европската Унија нема правна основа да распореди свои офицери на македонската граница. Македонија има неколку билатерални договори со земји членки на ЕУ со кои им се дозволува на полицајците од овие земји да патролираат заедно со македонските, но европските полицајци немаат извршни надлежности, велат дипломатите во Брисел кои работат на оваа тематика.

За дипломатите во ЕУ е неразбирливо да се држи во заложништво договор како Фронтекс поради билатерален спор околу македонскиот јазик и се потсетува дека сѐ додека договорот не е потпишан, Македонија нема законски обврски кон граничната агенција на Европската Унија.

На прашање на МИА, од Европската Комисија одговорија дека чекаат Софија и Скопје да го надминат спорот.

-Договорот не е сѐ уште на сила бидејќи преговорите продолжуваат. Референците за македонскиот јазик се единствената пречка за потпишувањето на договорот со Фронтекс. Комисијата ги охрабрува Бугарија и Македонија да изнајдат заеднички прифатливо решение, изјавија од портпаролската служба на Европската Комисија за МИА.