Државата сеуште нема точна бројка за вкупниот долг на општините

Државата се уште прави анализи за да утврди колку точно изнесуваат долговите на општините. Се уште нема информации и кои општини имаат блокирани сметки и кои се најзадолжени. Од Министерството за локална самоуправа велат дека Владата планира да земе кредит од 120 милиони евра за општините да ги исплатат долговите.

- Работиме системски дури и во делот да најдеме начин државата да земе кредит со ниски каматни стапки за да ги плаќаат долговите. Но и треба системско решение за да не се повтори пак истото со влегување во долгови на општините, изјави денеска министерот Сухејл Фазлиу.

Министерството обезбеди грантови од УНДП за 30 рурални општини. Парите ќе ги користат за капитални проекти. Министерот вели дека овој проект ќе им помогне на општините да научат како да не влегуваат во долгови. Нивните долгови влегуваат во вкупниот јавниот долг, што во моментот изнесува 48,8 отсто од бруто домашниот производ.