ДПА: Приведени над 250 демонстранти во Минск
Белоруските безбедносни сили на денешниот митинг во Минск приведоа над 250 демонстранти, соопшти Министерството за внатрешни работи, додека десетици илјади демонстранти се излезени на улиците низ главниот град на последниот, петти голем антивладин протест од претседателските избори, јави ДПА.
Огромна толпа луѓе е собрана во главниот град Минск, додека демонстрации се одржуваат и во други градови, додава германската агенција.
Голем контингент полицајци и војници уште од претпладнето беше видлив низ улиците во Минск, а многу од нив го блокираа Плоштадот на независноста и пристапните улици и булевари до него. Слични сцени беа видливи во градската Палата на Република, клучната владина зграда.
Споредните улици, исто така, се полни со безбедносен персонал и блиндирани транспортни возила.
Протестите веќе петта недела ја потресуваат Белорусија, откако голем дел од населението одби да ги прифати резултатите од последните избори, за кои властите соопштија дека му дадоа на претседателот Александар Лукашенко повеќе од 80 проценти од гласовите.
Тој со земјата владее над четвртина век и честопати се нарекува последен диктатор во Европа.
Групата за човекови права „Вијасна“ изјави дека многу од новоприведените се жени и дека за време на приведувањата е пријавено насилство.
Денешниот редовен неделен протест, под паролата „Маршот на хероите“, е фокусиран на притворените, како Марија Колесникова, која е затворена под обвинение за обид за соборување на владата. Нејзиниот адвокат ги оцени обвиненијата апсурдни, пренесе ДПА.
Ново на Сител
-
Мисајловски: Ќе ги скратиме непродуктивните трошоци, за пензионерите ќе има 5.000 денари покачување на пензиите
-
Во Украина 50.150 лица се водат како исчезнати
-
ОН: На Хаити е катаклизмична ситуацијата
-
Бела куќа: САД испратија писмено предупредување на Русија за нападот во Москва, бесмислица е тврдењето за вмешаност на Украина
-
МЗШВ: Со измените во Законот за стокови резерви, оризовата арпа се вбројува во листата на стратешки култури за државата
-
ВМРО-ДПМНЕ ги потврди листите за пратеници
-
Зеленски: Русија планира голема офанзива во наредните месеци
-
18-годишен тетовец украл автомобил, па направил сообраќајка