Македонија
5. March 2020 - 14:32

Димитров – Соботка: Австрија останува силен поддржувач за почеток на преговорите

Европските интеграции на Македонија и очекувањата од претстојниот Совет на ЕУ беа во фокусот на средбата на министерот за надворешни работи, Никола Димитров со претседателот на Националниот Совет на австрискиот Парламент, Волфганг Соботка,  кој престојува во официјална посета на земјава.

Како што соопшти МНР, во текот на разговорот Димитров потенцираше дека принципиелната и континуирана поддршка од австриските пријатели беше и останува од големо значење за нашите ЕУ аспирации.

-Министерот Димитров информираше за позначајните постигнувања и резултати во клучните реформски области, нагласувајќи дека посетата на австрискиот прв парламентарец доаѓа во контекст на позитивни моменти – новата методологија за пристапниот процес и позитивниот Извештај на Европската Комисија кој ја потврди препораката за отворање на преговорите со Македонија, што се надеваме овој пат ќе доведат заеднички успех, се наведува во соопштението.

Од страна на гостинот, пак, беше поздравена силната посветеност на Владата за спроведување на реформската агенда, неопходна за забрзување на европската интеграција на земјата. Соботка, како што се посочува, го реафирмираше ставот дека Австрија останува силен поддржувач за донесување одлука за отпочнување на преговорите со нашата земја во најскоро време.

Двајцата соговорници констатираа дека Македонија и Австрија оддржуваат блиски и мошне интензивни билатерални односи на повеќе нивоа, како од политички аспект, така и економски, пресликано преку фактот што Австрија е странски инвеститор број еден во нашата земја и спаѓа меѓу оние држави со кои имаме најбогата соработка во различни области од заемен интерес. Воедно, соговорниците разменија мислења и околу актуелните случувања на границите на ЕУ, стои во соопштението.