Македонија
23. September 2019 - 12:49

Бесплатни алатки за помош на малите и средните фирми при воведување иновативни производи

Пет иновативни алатки со методологија и центар за извонредност им се на располагање на домашните  мали и средни претпријатија како помош при воведување иновативни производи. Алатките се бесплатни и се достапни на веб страницата inoplatforma.eu.  Подготвени се преку регионалната Иноплатформата со финансии од Европската унија, проект во којшто водечка улога имаше Центарот за знаење од државава.

– Истражувањето во рамки на проектот покажаа дека кај малите и средните претпријатија има недостатоци за бизнис моделирање, користење алатки за претставување и реализација на нивниот бизнис модел, визуелизација, во однос на тоа како е конципирана нивната компанија и што  се може да стори на пазарот. Забележеваме и дека не успваат стратегијата лесно да ја преточат во проекти, додека самите проекти за  иновативните производи и услуги  се воведуваат архаично, без план, и многу често не резултираат во зголемени пазарни удели, продажба и профит. Од таа причина ги конципиравме алатките: Иномодел,  Иностратегија, Инофинансии, Инопроект и Инопартнер, со цел да можат да им помогнат на малите и средни  претпријатија успешно да воведуваат иновации, изјави Андијана Богдановска, проект менаџер на Иноплатформа.

Доколку има некој проблем или на малите и средните претпријатија им е потребна посложена поддршка можат да се обратат во центрите за извонредност каде може да консултираат експерт, а имаат ипрототипни студија со 3D печатари и скенери коишто можат да им дадат услуги во делот на првите прототипи за нивните производи.

Оливер Никушев од НСД солушнс, компанија за продажба и сервис на градежни машини информираше дека со помош на алатките успеале да добијат финансиска поддршка од Фондот за иновации.

– Од целосно услужна трговска компанија станавме услужна компанија, развивме модел на универзален нож за градежни машини и булдужери, за којшто претходно имаше увоз на многу различни типови. Направивме еден универзален тип којшто се произведува во државава, изјави Никушев.

Како што оцени Владимир Дуковски, професор на Универзитетот Св. Кирил и Методиј, компаниите можат да имаат трајна корист од алатките, една од послабите точки е немањето искуство, а Фондот за иновации треба побргу и поефикасно да носи одлуки за финансиска поддршка на фирмите.

– Во сегашниот систем  кога компаниите се директно префрлени на пазарет  непостоењето искуство е една од послабите точки. Државата се обидува  со Фондот за иновации и технолошки развој да помогне и треба да се признае дека таа помош навистина им помага како што е случајот со оваа компанија којашто доби финансиска поддршка, но нивниот процес е многу спор. Фондот одлучува со месеци, да не спомнам и со години и во тој период сепак ова се  компании кои понекогаш преживуваат и тоа може да биде многу  критично за нив. Моја сугестија е одлуките да се носат бргу и ефикасно за помош на компаниите, изјави професор Дуковски.