Македонија
15. December 2019 - 8:48

Тркалезна маса „Можности за регионална интеграција на Република Македонија во Европската Унија“

Тркалезна маса на тема „Можности за регионална интеграција на Република Македонија во Европската Унија“ ќе се одржи денеска во Скопје во организација на Унијата на европски федералисти на Македонија.

Настанот ќе го отвори претседателот на државата Стево Пендаровски, кој ќе говори на тема „Приоритетите во надворешната политика на земјава“, и Кристофер Глук, заменик-претседател на Унијата на европски федералисти (УЕФ) на тема „Европа помеѓу проширувањето и продлабочувањето – визијата на УЕФ“.

Како што најавија организаторите, на тема „Регионалните иницијативи – алтернатива или порта за ЕУ“ ќе говори министерот за надворешни работи Никола Димитров, Радан Канев МЕП / ЕНП, Илхан Ќучук МЕП / АЛДЕ и Никола Поповски, претседател на НСЕ и пратеник во Собранието.

Вицепремиерот задолжен за европски прашања Бујар Османи, францускиот амбасадор Кристијан Тимоние, Весела Чернева од Европски Совет за надворешни работи и Љубомир Филипович, претседател на УЕФ на Црна Гора ќе говорат на втората тема – „Регионален или одвоен пристап во преговорите со ЕУ“.

Третата тема ќе биде „Улогата на Собранието, науката, медиумите и НВО секторот во промоцијата и подршката на регионалните иницијативи“. Потпретседателот на Собранието Зеќир Рамчиловиќ, ќе зборува за можностите на Собранието во насока на поддршка на граѓанските иницијативи, а за подготвеноста на политичките партии да поддржат граѓански иницијативи ќе говорат Даниела Рангелова и Хари Локвенец, пратеници во Собранието.

За лажните вести во насока за дискредитација на граѓанските иницијативи ќе зборуваат Љубчо Нешков новинар и сопственик на „БгНес“ и новинарот и директор на МИА Драган Антоновски.