Трамп: ФБИ ја политизира истрагата за руското мешање во изборите

 Претседателот на САД, Доналд Трамп го обвини ФБИ и Министерството за правда дека ја политизираат истрагата за евентуалното мешање на Русија во американските претседателски избори во 2016 година.

- Раководството и истражувачите на ФБИ и на Министерството за правда го политизираат светиот истражувачки процес во корист на демократите, а против републиканците, што до неодамна беше незамисливо, напиша Трамп на Твитер.

Претходно, Белата куќа соопшти дека Трамп ќе дозволи објавување на доверлив меморандум, подготвен од републиканците, а во кој се обвинува ФБИ дека користи нападни техники за набљудување во истрагата за евентуалното руско мешање во изборите.

Во меморандумот наводно се опишува дека имало пропусти од страна на ФБИ во првите етапи на истрагата за наводната поврзаност помеѓу Трамп и Русите во текот на претседателските избори.