Балкан
1. October 2020 - 15:24

СИРИЗА: Пратеници од НД не му дозолуваат на Мицотакис да ги донесе во Парламентот договорите со Македонија

Околу 40 пратеници од Нова демократија не му дозволуваат на Мицотакис да ги донесе за гласање во Парламентот договорите со Македонија, заканувајќи се дека ќе гласаат против, велат, меѓудругото, од грчката опозициска партија СИРИЗА во соопштението во кое ја кометираат вчерашната владина седница.

Во грчкиот Парламент на 14 и  на 15 септември беа доставени предлог-законите за трите договори меѓу Македонија и Грција, односно за „Меморандумот за забрзување на процесот на интеграција на Македонија во ЕУ“, за „Меморандумот за формирање на Координативен комитет за економска соработка“ и за „Техничката спогодба за надгледување на FIR Скопје“, а согласно процедурите, прво треба да добијат зелено светло од надлежната Комисија за надворешни прашања и одбрана, а потоа да бидат ратификувани.

Откако поранешниот грчки премиер, а сега лидер на СИРИЗА Алексис Ципрас пред десетина дена најави дека тие како партија ќе побараат гласањето за ратификацијата на договорите да биде јавно и со прозивање на секој пратеник, според медиумите во Грција, постоело незадоволство во пратеничката група на Нова демократија, а Владата ќе ја одложи ратификацијата.

Претседателот на Парламентот Константинос Тасулас неодамна изјави дека ратификацијата не е итна.

Информативниот портал „Ин“, пишува дека засега Владата го замрзнува процесот на ратификација „што кога ќе се одржи ќе биде crash test во внатрешноста на Нова демократија“.

Портпаролот на грчката, Влада Стелиос Пецас, минатата седмица, одговарајќи на прашањето на дописничката на МИА од Атина, рече дека „не постои никакво прашање околу ратификацијата на договорите со Македонија“, објасни дека Нова демократија „како опозиција направи сѐ што можеме за да го спречи“ Договорот од Преспа, но сега кога Грција, во односите со Турција се повикува на меѓународото право, не може да не го зема предвид меѓународниот договор со Македонија.

За трите договори, кога и да дојдат во Парламентот, од опозициските партии, освен СИРИЗА, според најавите, позитивно ќе гласа и Движењето на промена.