Фекални бактерии во чешми и во мусаката во О.У. Димо Хаџи Димов, придонеле за труење кај учениците

На три чешми во училиштето Димо Хаџи Димов е пронајдена фекална бактерија, две во училниците и една во кујната, а истата бактерија е пронајдена и во мусаката од кујната, која укажува на нехигиена.

Кај една од вработените во кујна од брис е пронајдена стафилокока, а кај едно дете е откриен норовирус. Норовирус е вирус кој се пренесува преку вода или храна заразена со фекалии и може да егзистира многу долго на работни површини. Токму овие извори се сомнева дека ги предизвикале наглите и тешки симптоми кај голем број ученици од основното училиште, велат резултатите на Институтот за јавно здравје. 

Примероците од другата испитана храна која ја јаделе децата - млеко, мусли, кроасан, како и водата биле безбедни. Конечните анализи за водата ќе бидат готови утре, но досегашните анализи покажуваат дека водата е во ред за пиење. 

На детската клиника има нови хоспитализирани деца. Некои се веќе отшуштени, а во моментов четири ученици од ова училиште лежат на детската клиника. Тие се во добра здравствена состојба. До сега во Институтот има 30 пријави, од кои 29 се деца и една наставничка.

Препораките на ИЈЗ се оние кои имаат симптоми да не одат на учичиште, а најавуваат и вонредна дезинфекција.

Претходно од Водовод потврдија дека од земените примероци на вода и направените проверки, водата е безбедна за пиење. 

„Секторот за санитарна контрола зема 4 примероци од две локации (училница и кујна) од кои две за физичко-хемиска анализа и две за микробиолошка анализа. Од добиените резултати сите примероци физичко-хемиски и микробиолошки одговара на правилникот за барање за безбедност и квалитет на водата за пиење, при што констатираме дека водата во „Димо Хаџи Димов“ во општина Карпош е санитарно исправна и истата може непречено да се употребува“, се додава во соопштението.

Синот на премиерот пак, кој е меѓу децата со симптоми бил во добра здравствена состојба откако три дена примал инфузии. 

Наставата во основното училиште Димо Хаџи Димов и денеска тече непречено.