Продолжува амандманската расправа за Предлог-буџетот за 2026

Во собраниската Комисија за финансирање и буџет денеска попладне треба да продолжи амандманската расправа за Предлог-буџетот за 2026 година.

Според податоците објавени на веб страницата, седницата е закажана во 18 часот.

Во текот на вчерашниот ден беа прифатени неколку амандмани од опозицијата со кои се бараше доопремување за службите за Брза помош.

За Предлог-буџетот за 2026 година се поднесени вкупно 200 амандмани, а по завршување на амандманската расправа во собранската Комисија се очекува на 9 декември за него да се расправа на пленарна седница.

Во Предлог-буџетот за 2026 година вкупните приходи се проектирани на 374,7 милијарди денари, а вкупните расходи на 413,9 милијарди денари. За капитални инвестиции се планирани 40,5 милијарди денари. Економскиот раст е проектиран на 3,8 проценти, инфлацијата на 2,5, а буџетскиот дефицит на 3,5 проценти од БДП.

МИА