Македонија од денеска во СЕПА, плаќањето кон ЕУ поевтино

Плаќањето за македонските граѓани и компании кон Европската Унија станува поевтино. Од денеска Македонија е членка на СЕПА – единствената област за плаќање во евра.

Одобрени се апликациите на девет домашни банки, до крајот на годината се очекува уште три да се приклучат на СЕПА. Првите трансакции се направени уште денеска.

-За извршување на трансакции од 500 евра за граѓаните преку дигиталните канали, електронско и мобилно банкарство се нудат по шестпати пониски надоместоци. Додека, пак, приливите од странство граѓаните сега ќе ги добиваат за двојно пониски надоместоци. Компаниите, пак, за едно просечно дигитално плаќање од 20.000 евра сега ќе плаќаат осумпати пониски надоместоци, додека пак, приливите од странство ќе ги добиваат за тројно пониски надоместоци, вели вицегурвернерката Емилија Нацевска.

Народната Банка засега нема проекции колкави ќе бидат заштедите за компаниите и за граѓаните на годишно ниво. Но вицегувернерката Нацевска вели дека тоа најмногу ќе го почувствуваат малите и средните претпријатија кои ќе имаат подобар пристап до Заедничкиот европски пазар.

Нацевска вели, влезот на Македонија во СЕПА ќе значи и поголема конкурентност и развој на трговските односи.

Единствената област за плаќање во евра – СЕПА опфаќа вкупно 41 држава од Европа.